Follow Balay Sugidanun on WordPress.com
Halit ni SuperTyphoon Yolanda sa Barbaza, Antique /Litrato: Faith Asenjo-Laurio
Yolanda pamatii
Balikda ang tanan mo nga ginpang-agyan
Ikaw lang ang naglabay
Duru katama ang nagkarahapay nga balay
Nagkaraanod nga mga pinangabudlayan
Kag ginlugdang mo ang handum kang kadam-an
Yolanda pamatii
Duru katama nga kabuhi ang imo gindaga
Daad mabatian mo ang nguynguy
Kang mga bata nga ginbul-an mo ginikanan
Ang hibi kag panangis kang mga ginikanan
Nga ginbul-an mo bata
Kag ang bilog nga pamilya nga imo gindura
Halit ni SuperTyphoon Yolanda sa Barbaza, Antique /Litrato: Faith Asenjo-Laurio
Yolanda pamatii
Daad batyagan mo ang gutum
Kang nagaraguuk nga mga busong
Ang ramig kang kagab-ihon
Nga nagakunop sa tagsa-tagsa nga naduraan
Ang dulum nga nagalamon sa anda baratyagon
Halit ni SuperTyphoon Yolanda sa Barbaza, Antique/Litrato: Faith Asenjo-Laurio
Yolanda pamatii
Sa ginhawanan mo nga banas
Kami tanan rugto ang amat-amat manubo
Manarinsing
Marabong
Mang-ugat
Kag magpabakod
Sa imo nga ginpang-ubra, kami sa gihapon mamutwa
Iririmaw nga magpapag-on
Magbangon
Kag magpadayon
Filed under: DAGYAW, GIL MONTINOLA, KINARAY-A Tagged: Antique, Balay Sugidanun, Binalaybay, GIL MONTINOLA, KINARAY-A, Super Typhoon Yolanda
